Cum taurus ingens in arenam esset missus prodissetque ad eum feriendum venator neque productum decies potuisset occidere, Gallienus coronam venatori misit. Mussitantibus cunctis quid rei esset, quod homo ignavissimus coronaretur, Caesar per curionem dici iussit: “Taurum toties non ferire difficile est.” Nec iniuste videri potest tulisse coronam, qui pugnaci tauro toties occurrit. Hist. Aug. 23.12.5
Antagoram poetam in tentorio coquentem congrum versantemque patellam deprehendit Antigonus dixitque: “Putasne, Antagora, Homerum, cum Agamemnonis res gestas scriberet, coxisse congrum?” Contra haec Antagoras: “Et tu, rex, credis, Agamemnonem, cum talia gereret, fuisse curiosum si quis in exercitu congrum coqueret?” Plut. Mor. 182F
flet uxor tristis; illius propinquat coniunx leto: amboque lugent invicem dolore inexpleto.
fert causa dispar exitium eundem; vir horrescit ne moriatur; mulier ne vivat, expavescit.
Herbert H.Huxley
DĪGESTIŌ
In thermopoliō Londinēnsī paene vacuō, diē hiemālī miserō, aliquot aderant pōtātōrēs quiētē sorbillantēs ubi ecce typicus advena Statunitensis pervēnit, manifestō haud grātē permōtus hāc terrā, tempestāte eius, necnōn omnibusque ad eam pertinentibus. Glōriōsē dēclāmat, "Quālem terram pediculōsam! Tabernae clausae sunt magnam partem temporis, frīgida, madida, ventōsa, cerevīsia sapit ūrīnam quae eōdem illīus frīgoris gradu adfertur, viae cōnfertae sunt commeātū, nē raedam quidem meritōriam tibi adsequi potes." Nōnnūllī tranquillē discēdunt. Ipse virum ingenuum intuētur quī placidē jūniperum rosāceum sorbillat, cui dīcit, "Heus tū cītrōnimulge, quō pactō pateris vīvere locō tam miserō?" Plānē praetermissus ipse videt etiam plūrēs discēdentēs. Postquam amplius sē jactāverat, tantum Anglus ingenuus, caupō, et Amerīcānus relinquuntur. Hic "Heus tū cītrōnimulge," inquit, tē adloquor. Omnibus fermē in terrīs orbis fuī et haec omnium est magis pediculōsa. Nesciō quī hīc vīvere passus sis. Haec terra prōrsum pōdex est mundī." Vir ingenuus jūniperum rosāceum bibēns brevī īnsistit, iterum sorbillat et, sē vertēns, ēleganter e Statunitense percontātur: "Rēctē quidem, anne tū modō permeāre meditāris?"
(apud Gregem Latine Loquentium anno 2012 mense Augusto editum)
DE AVIBUS APIBUSQUE Pater loquitur cum filio et rogat eum utrum de "avibus et apibus" iam sciat.
Cui ille: "Siste pater! Nulla de hoc audire volo!" et incipit plorare. "Pollicere mihi te nunquam de hoc plus dicturum esse!"
"Mehercle! Fili mi," ait pater attonitus stupefactusque, "quam ob rem hoc de me petis?"
"Mi pater," respondet filius, "cum sex annos natus eram, dixisti mihi Sanctum Nicolaum tantum historiam puerilem esse, cum septem annos natus eram dixisti mihi Cuniculum Paschale quoque tantum mythihistoriam esse, cum octo annos natus eram dixisti mihi Sagam Dentium non existere. Si nunc mihi dicis homines adultos reapse non futuere, quam spem habebo in futura mea juventute?"
(apud Gregem Latine Loquentium anno 2001 mense Iunio a Francisco editum et ano 2017 a Iohanne leviter emendatum)
